Mae'r gwaith realiti ymestynnol 21 munud o hyd yma sydd wedi'i gynllunio ar gyfer cromenni a phlanetaria yn dod â straeon pedair seren yn fyw wrth iddyn nhw gael eu rhannu gan y seryddwr a’r awdur o dras Ininew (Cri), Wilfred Buck. Mae'r straeon yn amrywio o’r ymarferol i’r barddonol, gan gynnig arweiniad ar lywio, cylchoedd y tymor a byw'n dda ar gyfer cenedlaethau'r dyfodol. Mae WILFRED BUCK'S STAR STORIES yn rhannu safbwynt Cynhenid nad ydyn ni’n ei glywed yn aml ar seryddiaeth a chosmoleg. Mae'r profiad yn cynnwys sinematograffeg awyr nos ymdrochol, CGI cosmig a lluniau macro manwl o feteorynnau, i gyd wedi'u gosod i drac sain sy’n mynd â ni ar daith. Mae'n cyfuno ehangder y bydysawd ag agosatrwydd gwrando ar Hynafgwr doeth, gan ein hatgoffa mai'r sêr yw ein perthnasau hynaf.

Gosodwaith sy’n archwilio’r rhyngweithio rhwng bodau dynol a deallusrwydd artiffisial yw ‘AI & Me’, gan ganolbwyntio ar farn, canfyddiad, a pha mor agored ydyn ni i ddadansoddiad peiriant. Yn ganolog i'r profiad mae ‘The Confessional’, lle mae cyfranogwyr yn cael barn ddi-flewyn-ar-dafod deallusrwydd artiffisial yn seiliedig ar sut maen nhw’n edrych. Mae 'AI Ego' yn ymestyn hyn, gan arddangos cyfranogwyr mae’r peiriant yn eu "hoffi" mewn sefyllfaoedd swrealaidd sydd wedi’u creu gan ddeallusrwydd artiffisial. Mae'r gosodwaith yn herio ein cysur gyda barn dechnolegol ac yn annog myfyrdod ar oblygiadau cymdeithasol ehangach deallusrwydd artiffisial.

Beth fyddech chi'n ei wneud petai eich cartref chi’n ymddangos fel petai mewn perygl? Ers dechrau'r rhyfel, mae miliynau o Wcreiniaid wedi wynebu'r cwestiwn yma. Profiad ymdrochol mewn realiti cymysg yw ‘Fragile Home’ sy'n gofyn y cwestiwn yma i bob un ohonon ni. Cyfle i brofi’ch amgylchedd cyfarwydd yn cael ei weddnewid yn gartref teulu o Wcráin. Wrth i chi deithio drwy’ch gofod, mae lleisiau Wcreiniaid yn canu alawon traddodiadol yn gwmni i chi, gan eich tywys at eich atgofion a’ch teimladau chi eich hunan sy’n gysylltiedig â’ch cartref.

Tynnwch hunlun er mwyn dod yn hen hen nain neu daid i rywun 200 mlynedd yn y dyfodol. Profiad grŵp rhyngweithiol ac ymdrochol yw Ancestors fydd yn gwneud i chi gysylltu'n ddwfn â'ch cyd-chwaraewyr a gyda chenedlaethau'r dyfodol. Pa fath o fyd fyddwn ni'n ei adael i genedlaethau'r dyfodol? Yn Ancestors, byddwch chi'n cychwyn ar daith ar y cyd gyffrous, chwe chenhedlaeth i'r dyfodol. Mae'r profiad rhyngweithiol yma fydd yn cael ei arwain gan eich ffôn clyfar chi’ch hunan yn defnyddio deallusrwydd artiffisial i greu cysylltiadau rhyngoch chi ac eraill yn yr ystafell. Gyda'ch gilydd, byddwch yn archwilio heriau'r dyfodol, gan ddarganfod sut mae cydweithio yn allweddol er mwyn siapio byd gwell. Ymunwch â'r antur hwyliog, ymdrochol ac ysgogol yma sy'n dod â phobl at ei gilydd mewn ffordd hollol newydd!

Cyfle i ymgolli yn Alabama’r pumdegau a chalon y frwydr dros hawliau sifil. Mewn lleoliad sydd wedi'i gynllunio'n arbennig, mae ymwelwyr sydd â phensetiau realiti estynedig a systemau sain dargludiad esgyrn yn cael eu cludo i Alabama’r pumdegau. Mae'r profiad ymdrochol 32 munud yma, sydd wedi ennill gwobrau, yn caniatáu i bobl ail-fyw, fel pe baen nhw yno, weithred ddewr Claudette Colvin—merch 15 oed a wrthododd ildio’i sedd ar fws, a hynny naw mis cyn Rosa Parks.

Gan dynnu ar alar Libby Heaney yn dilyn marwolaeth sydyn ei chwaer, mae Heartbreak and Magic yn archwilio dimensiynau ychwanegol ffiseg cwantwm fel naratifau amgen ar sut rydyn ni’n meddwl ac yn teimlo am yr hunan, bywyd a marwolaeth. Mae'r gwaith realiti rhithwir yma’n eich gwahodd i gysylltu'n ddwfn â'ch emosiynau drwy archwilio ystyr bodolaeth a cholled annisgwyl. Gallwch ddisgwyl stori aml-haenog, newidiol sy'n dwyn i gof themâu’n ymwneud â chylch bywyd, yr ymylon a'r amlfydysawd. Datblygodd Heaney y gwaith drwy broses iteraidd, arbrofol oedd yn cynnwys ffurfiau corfforol a digidol o greadigrwydd: ymarfer symud, ysgrifennu, tynnu lluniau a phaentio, i god cyfrifiadura cwantwm pwrpasol a gwaith prototeipio injan gemau. Mae Heartbreak and Magic yn dod â'i harbrofion gyda chyfrifiadura cwantwm i realiti rhithwir am y tro cyntaf.