Ar ôl marwolaeth drasig ei wraig, mae Guan yn etifeddu ei nofel anorffenedig – stori sy'n cydblethu'r llewpard brith sydd mewn perygl a myth tarddiad cysegredig llwyth y Rukai. Wedi'i yrru gan alar a chwilfrydedd, mae'n cychwyn ar daith swreal i'r mynyddoedd ac i'w hisymwybod, wedi'i arwain gan ei geiriau hi ac adleisiau hynafol y goedwig, gan chwilio am atebion, iachâd a chysylltiad. Profiad realiti rhithwir penrhydd un defnyddiwr yw The Clouds Are Two Thousand Meters Up, ac addasiad o stori gan yr awdur clodwiw o Taiwan, Wu Ming-Yi, lle mae'r ffiniau rhwng cof, realiti a myth yn toddi'n ddim.

Profiad realiti rhithwir aml-chwaraewr penrhydd yw Dark Rooms – gwaith dogfen animeiddiedig lle mae cynulleidfaoedd yn crwydro'n gorfforol drwy straeon personol yn ymwneud â rhywioldeb, hunaniaeth, trawma a thrawsnewid, wedi'u hadrodd gan y bobl oedd yn eu byw. Cyd-greodd pedwar prif gymeriad eu straeon o dan yr egwyddor "dim byd amdanon ni, hebddon ni," gan arwain ymwelwyr drwy glybiau nos, ystafelloedd cefn, a bydoedd breuddwydiol gyda chyffyrddiad o chwedl dylwyth teg dywyll. Wrth wraidd pob stori mae taith emosiynol – hiraeth, ofn, ymddiriedaeth a rhyddhad. Cyd-gynhyrchiad Danaidd-Almaenig-Taiwanaidd, a berfformiwyd am y tro cyntaf yng ngŵyl ymdrochol Fenis 2025 ac fu'n llwyddiannus yn NewImages Paris 2026.

Gosodwaith clyweledol – opera ymdrochol yw Fossilized Futures, sy'n cysylltu ecosystemau hynafol, tirweddau presennol, a dyfodol dychmygol. Drwy sain amlsianel, data afonydd, a lleisiau dynol, mae'n archwilio cysylltiadau rhwng amser, ecoleg, a gweithgarwch dynol, wedi'i arwain gan gof ffosilau ac afonydd byw. Mae dau ffigur yn arwain y stori: Studiella devonica, rhywogaeth ffosil o'r cyfnod Defonaidd, ac eog yr Iwerydd yn Afon Meuse, y mae ei frwydr i oroesi yn adlewyrchu'r tensiynau rhwng amser dwfn, gwydnwch naturiol, ac aflonyddwch pobl. Mae'r gwaith yn cysylltu ecolegau afonydd lleol â sawl hanes a dyfodol ehangach sy'n llifo ar draws daearyddiaethau.

Gan gyfangu 100 mlynedd o ddata hinsawdd i mewn i arddangosfa undydd, ecosystem rithwir yw Gondwana sy'n esblygu'n gyson ac sy'n archwilio dyfodol posib coedwig law hyna'r byd, y Daintree. Fel y goedwig law ei hunan, system o bosibiliadau yw Gondwana. Mae tywydd, tymhorau a bioamrywiaeth yn newid ac yn symud wrth i ddefnyddwyr fynd ati i archwilio map helaeth o afonydd gwyllt, ceunentydd garw a choed hynafol. Ond mae naratif ehangach yn codi islaw: dros amser, mae'r goedwig law yn dirywio'n systematig, wedi'i bwydo gan ragolygon data hinsawdd. Yr unig iachâd i'r dirywiad yma, sy'n ymddangos yn anochel, yw pobl: y mwyaf o amser sy'n cael ei dreulio yn y goedwig law, y mwyaf gwydn yw hi. Mae pob dangosiad o'r gosodwaith yma'n amhosib ei ailadrodd ac yn ddamcaniaethol: yn fyfyrdod ar amser, newid a cholled mewn ecosystem anhepgor.

Mae Sarah Jane Tully, actiwari 53 oed, yn mynd ar ei gwyliau cyntaf ers blynyddoedd, ac rydych chi wedi cael eich cyflogi i wneud ei gwaith yn ei lle. Mae TEMPING, stori ryfedd a chomig am fywyd mewnol gweithiwr, yn cael ei pherfformio i gynulleidfa o un gan gyfrifiadur Windows, ffôn gorfforaethol, argraffydd laser a chyfres meddalwedd Microsoft Office. Gan sefyll yn y bwlch yng ngweithfan Sarah Jane, byddwch chi’n diweddaru cofnodion cleientiaid, yn anfon negeseuon e-bost, ac yn clywed ychydig o ramant yn digwydd yn y swyddfa. Llongyfarchiadau, chi yw'r temp newydd! Byddwch yn barod am waith. Heb ddim perfformwyr byw, mae'r darn yn rhyngweithio â'r aelod unigol o'r gynulleidfa ac yn eu herio gyda themâu'n ymwneud â rhyngweithio dynol trwy dechnoleg, unigedd a marwolaeth. Gan gyferbynnu anhysbysrwydd taenlen Excel ag eiliadau cudd o agosatrwydd dynol, mae TEMPING yn eich tynnu'n ddwfn i galon gorfforaethol America.

Mae Blur yn cyhoeddi myth newydd ar gyfer yr oes fodern, lle mae gwyddoniaeth wedi newid sut rydyn ni'n meddwl am fywyd a marwolaeth. Gyda dyfodiad clonio a datblygiadau mewn bioleg atgyfodi, rydyn ni'n diddymu'r ffiniau sy'n gwahanu'r byw a'r meirw – a'r naturiol a'r artiffisial. Mae'r cynhyrchiad theatrig realiti estynedig yma'n datblygu fel tirwedd freuddwydiol, gan symud yn gynnil rhwng y byd go iawn a'r byd rhithiol wrth i gyfranogwyr gael eu tywys ar daith o fyfyrio ar alar a thragwyddoldeb.